OFAB የኢትዮጵያ ፕሮግራም የምስራቅ ንዑስ ፕሮግራም በሀረማያ ዩነቨርሲቲ አቋቋመ

በኢትዮጵያ የግብርና ምርምር ኢንስቲትዩት የOFAB (Open Forum On Agricultural Biotechnology In Africa) የኢትዮጵያ ፕሮግራም የምስራቅ ንዑስ ፕሮግራም በሀረማያ ዩነቨርሲቲ መጋቢት 24 ቀን 2009 ዓ.ም ከዩኒቨርሲቲው የበላይ አመራር እንዲሁም ጉዳዩ ከሚመለከታቸው መመህራን እና ተማሪዎች ጋር በመነጋገር እንዲቋቋም ተደርጓል፡፡

African Agricultural Technology Foundation (AATF) የሚባል ድርጅት በአፍሪካ ስምንት አገሮች ውስጥ በሚገኙ አጋር ድርጅቶች ጋር በመሆን እ.ኤ.አ በ2006 OFAB (Open Forum On Agricultural Biotechnology In Africa) በባዮቴክኖሎጂ ዙሪያ መደበኛ በሆነ ሁኔታ ተአማኒ የሆነ የመረጃና እውቀት ልውውጥን ለማመቻቸት በሚል አላማ እንዲቋቋም አድርጓል፡፡ 

ይህ ፕሮግራም በኢትዮጵያ እ.ኤ.አ በ2014 የተጀመረ ሲሆን ከዚህ ጊዜ ጀምሮ በዘርፉ የእውቀትና የመረጃ ልውውጥ በማድረግ የተለያዩ ተግባራትን ሲያከናውን ቆይቷል፡፡ ከነዚህም መካከል በተመረጡ ከፍተኛ ት/ት እና የምርምር ተቋማት የተለያዩ ንዑሳን ፕሮግራሞችን በመመስረት ለተመራማሪዎች፣ ለዩኒቨርሲቲ መምህራን እና ለተማሪዎች በግብርና ባዮቴክኖሎጂ ዙሪያ ግንዛቤ የማስጨበጥ፣ መረጃን መሰረት ያደረገ የእውቀት ልውውጥን ማመቻቸት፣ በሌሎች አገሮች ያሉ ተሞክሮዎችን እና ልምዶችን ማካፈልና አቅም መገንባት የመሳሰሉትን ተግባራት በማከናወን ላይ ይገኛል፡፡ ከዚህ በተጨማሪም በአራት ዙር የተለያዩ የሚዲያ አካላትን በዘርፉ ዙሪያ በቂ ግንዛቤ እንዲያገኙ ለማድረግ የተለያዩ ስልጠናዎችን በማዘጋጀት ለሚዲያ አካላቱ ግንዛቤ አስጨብጧል፡፡

በምስራቅ ንዑስ ፕሮግራሙንም ከሀረማያ ዩኒቨርሲቲ አስተዳደር፣ የሚመለከታቸው መምህራን እና ተማሪዎች በተገኙበት በፕሮግራሙ ዙሪያ ግንዛቤ በማስጨበጥ ንዑስ ፕሮግራሙ እንዲመሰረት ስምምነት ላይ ተደርሷል፡፡ በውይይቱም በተለይ በአሁኑ ወቅት ለግብርና ምርት እድገት ተግዳሮት የሆኑትን የአየር ንብረት ለውጥ፣ የተለያዩ የሰብል በሽታዎች እና  ተባዮች ችግር ለመፍታት፣ እንዲሁም እያደገ የመጣውን የህዝብ እድገት እና ለምግብ ዋስትና፣ ለግብርና-ኢንደስትሪ ግብዓትነት፣ ለወጪ ንግድ የሚሆኑ ከፍተኛ የሆነ የግብርና ቴኬኖሎጂና መረጃ ፍላጎትን ለማርካት በግብርናው ዘርፍ በተለይ በግብርና ምርምር እንደ ባዮቴክኖሎጂ ያሉ የምርምር ቴክኖሎጂዎችና ዘዴዎችን ከመደበኛ የምርምር መንገድ ጎን ለጎን መጠቀም አማራጭ የሌለው ጉዳይ መሆኑ ተብራርቷል፡፡  

የኢትዮጵያ የግብርና ምርምር ኢንስቲትዩት ምክትል ዋና ዳይሬክተር ዶ/ር አዱኛ ዋቅጅር፣ የሀረማያ ዩኒቨርሲቲ የአካዳሚክ ም/ፕሬዚዳን የሆኑት ፕሮፌሰር ንጉሴ ደቻሳ፣ የዩኒቨርሲቲው የምርምር ም/ፕሬዚዳንት ዶ/ር ጀማል የሱፍ እና የፕሮግራሙ አስተባባሪና በኢትዮጵያ የግብርና ምርምር ኢንስቲትዩት የግብርና ባዮቴክኖሎጂ ዳይሬክቶሬት ዳይሬክተር ዶ/ር እንዳለ ገብሬ በውይይቱ ላይ የተገኙ ሲሆን የOFAB ፕሮግራምን አስመለክቶ በዶ/ር እንዳለ ገብሬ፣ አጠቃላይ የግብርና ባዮቴክኖሎጂ ምርምርን አስመልክቶ በዶ/ር መላኩ አለሙ፣ የብሄራዊ ግብርና ባዮቴክኖሎጂ ምርምር ማዕከል ዳይሬክተር እና በሌሎች ተመራማሪዎች የተለያዩ ጽሁፎች ቀርበው ውይይት ተደርጎባቸዋል፡፡ በቀጣይም በዩኒቨርሲቲው የንዑስ ፕሮግራሙን ሴክሬተሪያት መሰየም፣ አስተባባሪ ኮሚቴ መምረጥና ማደራጀት፣ እና ሌሎች ባለድርሻዎችን ለማስተባበር የሚያስችል የዕቅድ ዝግጅትና ትግበራን ሰነድ ዝግጅትን ለማከናወን የቤት ስራዎችን በመውሰድ ውይይቱ ተጠናቋል፡፡