ጥቅምት 16 ቀን 2017 ዓ.ም.

የኢትዮጵያ የግብርና ምርምር ኢንስቲትዩት/አሰላ

በኢትዮጵያ የግብርና ምርምር ኢንስቲትዩት የቁሉምሳ ግብርና ምርምር ማዕከል በለሙ እና ቢልቢሎ ወረዳ በቆጂ ከተማ እንዲሁም በምርምር ማዕከሉ የተለያዩ የባለድርሻ አካላት በተገኙበት ማለትም የኦሮሚያ የግብርና ትራንስፎርሜሽን፤ የአሰላ ብቅል ፋብሪካ ኃላፊዎች፣ የአሰላ ከተማ አስተዳደር እና የግብርና ቢሮ ኃላፊዎች፤ የማዕከሉ ተመራማሪዎች እንዲሁም የዋናው መ/ቤት አመራሮች በተገኙበት የመስክ ጉብኝት አካሂዷል፡፡ ጉብኝቱ በአካባቢው ባህል መሠረት በአገር ሽማግሌዎች ምርቃት ተጀምሯል፡፡ 

የመስክ ጉብኝት ቀንኑ አስመልክቶ የእንኳን ደህና መጣችሁ ንግግር ያደረጉት የቁሉምሳ ግብርና ምርምር ማዕከል ዳይሬክተር አቶ ደበሌ ደበላ ሲሆኑ የመስክ ጉብኝቱን ለመታደም የተገኙትን እንግዶች አመስግነዋል፡፡ ቀጥለውም የቁሉምሳ ግብርና ምርምር ማዕከል ከተቋቋመበት እ.ኤ.አ ከ1960ዎቹ ጀምሮ በተለይ በዳቦ ስንዴ፤ በብቅል እና በምግብ ገብስ እንዲሁም በሌሎች ዘርፎች ከፍተኛ ውጤቶችን ሲያስመዘግብ ቆይቶ በአሁኑ ወቅት በአገር ደረጅ የስንዴ የልህቀት ማዕከል እንደሆነ ገልፀዋል፡፡ በመቀጠልም በመጀመሪያ የመስክ ጉብኝት በተካሄደበት የቦቆጂ ንዑስ ጣቢያ የስንዴ እና የገብስ የመነሻ ዘር ማባዣ ማሣን እንዲሁም የአፈሩን ለምነት ለመጠበቅ ያስችል ዘንድ በፈረቃ የሚለሙ የባቄላ፣ የአተር እና የተልባ ማሣዎች ለጉብኝት መቅረባቸውንና የምርታማነት መጠንን በዝርዝር አሰረድተዋል፡፡ 

በኢትዮጵያ የግብርና ምርምር ኢንስቲትዩት የም/ም ዋና ዳይሬክተር ዶ/ር ድሪባ ገለቲ የመክፈቻ ንግግር ያደረጉ ሲሆን ኢንስቲትዩቱ በአገራችን ከሚገኙ ትላልቅ ተቋማት አንዱ ሲሆን ቴክኖሎጂ በመልቀቅ፤ የመነሻ ዘር በማባዛትና በማሰራጨት፤ ቴክኖሎጂ በማስተዋወቅ እና የአቅም ግንባታ በመገንባት ረገድ የተሰጠውን ተለልዕኮ በተግባር ከሚወጡት ዋነኛው ነው ብለዋል፡፡ የቁሉምሳ የግብርና ምርምር ማዕከልም በኢንስቲቲዩቱ ስር ከሚገኙ ትልልቅ ማዕከላት ትልቁ እንደዚሁም ከፍተኛ ስራዎችን ከሚሰሩት መካከል አንዱ መሆኑን አፅንዖት ሰጥተው ተናግረዋል፡፡

በማዕከሉ ግቢ እና በሌሎች ንዑስ ጣቢዎች ጉብኝት ከተካሄደ በኋላ ከተለያዩ የባለድርሻ አካላት አበረታችና ገምቢ ግብረ-መልስ ቀርቧል፤ በመጨረሻም ውይይት የተደረገ ሲሆን በኢንስቲትዩቱ የም/ም/ ዋና ዳይሬክተር ዶክተር ድሪባ ገለቲ ሰፋ ያለ ማብራሪያና የስራ መመሪያ ተሰጥቶ የዕለቱ መርሐ-ግብር ተጠናቋል፡፡